ՓԱՍՏԵՐ ԵՎ ՏՎՅԱԼՆԵՐ ԵՐԵՎԱՆՈՒՄ ԱՄՆ ԴԵՍՊԱՆԱՏԱՆ ՆՈՐ ՇԵՆՔԻ ՎԵՐԱԲԵՐՅԱԼ
ԱՄՆ դեսպանատան նոր շենքը գտնվում է Երևանյան լճի հարևանությամբ մի հողատարածքի վրա, որի ընդհանուր մակերեսը կազմում է 90,469 քառակուսի մետր (22 ամերիկյան ակր): Սա մեկն է այն ամենամեծ հողատարածքներից, որի վրա կառուցվել է ամերիկյան դեսպանատուն:
Դեսպանատան նոր շենքի տեղն ընտրվել է ՀՀ կառավարության հետ լուրջ ու բաց քննարկումների արդյունքում, որի ընթացքում դիտարկվել են տասնյակ տարբերակներ ու դրանցից ընտրվել է մի այնպիսի տարբերակ, որը լավագույնս բավարարում է ամերիկյան ու հայկական կառավարություններին:
Երևանում դեսպանատան նոր շենքի կառուցման համար նախատեսվել էր 80 մլն ԱՄՆ դոլար:
Դեսպանատան նոր համալիրը ներառում է հինգհարկանի գլխավոր մասնաշենքը 13470 քառակուսի մետր ընդհանուր մակերեսով, երկհարկանի օժանդակ մասնաշենքը, որտեղ տեղակայված են ԱՄՆ Միջազգային զարգացման գործակալության ու Ընդհանուր ծառայությունների վարչության գրասենյակներն ու կից պահեստային տարածքը և հիմնական ու ծառայողական մուտքերի վերահսկման կետերը: Չնայած դեսպանատան համալիրի զբաղեցրած տարածքը արտերկրում Պետքարտուղարության ունեցած ամենամեծ տարածքներից մեկն է, սակայն հիմնական մասնաշենքն աշխարհում եղած ամենամեծ դիվանագիտական կառույցներից չէ, ու ոչ էլ աշխատողների թվով է դասվում ամենամեծ կառույցների շարքին:
Նախագծաշինարարական պայմանգիրը կնքվել է 2001թ.: Հիմնական կապալառուն էր ՋեյԷյ Ջոնս Քընսթրաքշեն ընկերությունը Միացյալ Նահանգների Հյուսիսային Կարոլինա նահանգից: Այս ընկերության հիմնական ենթակապալառուն Հայաստանում «ՄԼԼ Ինդասթրիզ» ընկերությունն է:
Այս նախագծի կառավարումն իրականացվել է ԱՄՆ Պետքարտուղարության Արտերկրի շինարարական աշխատանքների գրասենյակը:
Աշխատանքներին մասնակցել են 825 հոգի, որոնցից 75-ը ամերիկացիներ, 5-ը ֆիլիպինցիներ, 135-ը թուրքեր, իսկ 632-ը հայեր:
ԱՄՆ կառավարությունը հողատարածքը ձեռք է բերել շուկայական գներով` դրա համար ՀՀ կառավարությանը վճարելով շուրջ 5 մլն ԱՄՆ դոլար: Վաճառքի պայմանագրով նախատեսված են մի շարք դրույթներ, որոնք ապահովում են ամերիկյան ու հայկական կողմերի իրավունքների պաշտպանությունը: Նոր դեսպանատունը չի փակում քաղաքացիների մուտքը դեպի Երևանյան լիճ, որը լիճը շարունակում է մնալ որպես Հայաստանի Հանրապետության ունեցվածք:
Դեսպանատան նոր շենքի կառուցումը պայմանավորված էր վերջին տարիներին հայ-ամերիկյան հարաբերությունների ընդլայնմամբ: Դեսպանատան նոր համալիրը իր դռներն է բացել դեսպանատան ամերիկացի ու հայ աշխատողների ու այցելուների առաջ` ապահովելով գրավիչ ու անվտանգ միջավայր: ԱՄՆ դեսպանատունը հանդիսանում է նաև լուրջ ներդրում Հայաստանի շինարարական արդյունաբերության մեջ, մասնավորապես կադրերի ուսուցման ու մասնագետների պատրաստման տեսանկյունից:
Դեսպանատան նոր համալիրը կառուցվել է ճարտարապետաշինարարական նորմերի ու ստանդարտների համաձայն, ունի բարձր սեյսմակայունություն: Բազմաթիվ տեխնիկական հսկողության խորհուրդներ թե ԱՄՆ-ում, թե Հայաստանում հավաստիացել են, որ այն համապատասխանում է տեղի բոլոր ճարտարապետաշինարարական նորմերին ու լավագույնս ներկայացնում է Միացյալ Նահանգները:
ԱՄՆ Դեսպանատան նոր շենքը:
|
